Наурызнама: Шымкентте Ұлыстың ұлы күні қалай өтіп жатыр

Шымкентте көктемгі көңіл күй, нағыз қазақы рух сезіліп тұр! Мал аузы көкке, адам аузы аққа тиген осынау Ұлы күнді тойлауға мегаполис жұрты тайлы-тұяғы толық жиналған. Астана алаңында Ұлыстың Ұлы күніне арналған негізгі салтанатты іс-шаралар өтіп жатыр, деп хабарлайды Almaty.tv.

Алаңда әдеттегідей киіз үйлер тігіліп, қолөнер шеберлерінің көрмелері, жәрмеңкелер, ұлттық спорт ойындары мен түрлі сайыстар ұйымдастырылды.

«Бүгін – ақ түйенің қарны жарылған күн. Әжелер «немереміздің болашағы жарқын болсын» деп тілейміз! Елімізде тыныштық болсын!» – деді қала тұрғыны.

Шымкентте тұрғындардың басым бөлігі ұлттық киім киіп келген. Ақ жаулықты аналар әсем оюлы камзолдарын киіп, қыз-келіншектер бүрмелі көйлекпен, ал жігіттер шапан, тақиямен сәнденіп жүр. Бұл мерекенің ажарын аша түскендей!

Ұлттық киімнің әрбір деталінің өзіндік мән-мағынасы бар. Кестеленген оюлар сонау XIX ғасырдан сыр шертеді. Сол кезеңде қазақ қолөнерінде кестелеу өнері ерекше дамыған. Кестелеу негізінен түрлі-түсті жіптермен, әсіресе қызыл, көк, жасыл, сары түсті жіптермен тігілген. Ою-өрнектердің әрқайсысы белгілі бір мағына берген.

Қазақ қыздарының киімі нәзіктік пен сұлулықты айшықтайтын ерекше үлгіде тігілген. XIX ғасырдағы бойжеткендер кең етекті, бүрмелі көйлек киген. Ою-өрнек кестелеген, көбіне барқыттан тігілген камзол және де төбесіне үкі қадалған, кестемен немесе моншақпен өрнектелген бас киім киген.

Қазақ халқының ұлттық киімдері – ғасырлар бойы қалыптасқан дәстүрлі мәдениеттің бір бөлігі.

Айта кетейік, мейрам мегаполистің барлық ауданында кең көлемде өтіп жатыр.

Оқи отырыңыз: Ұлттық киім: Гиннес рекордын орнатуды көздеген маңғыстаулықтардың дайындығы қалай