Қазақстанның шығысында ауа райы бұзылып, тасжолдар жабылды
«ҚазАвтоЖол» осыған қатысты мәлімдеме жасады
Қазақстанның шығысындағы екі бірдей облыста ауа райына байланысты тасжолдар жабылды, деп хабарлайды Azattyq Rýhy.
«ҚазАвтоЖол» осыған қатысты мәлімдеме жасады.
2025 жылғы 24 наурыз сағат 22:00-де Абай облысында ауа райының нашарлауына байланысты «ҚХР шекарасы – Майқапшағай – Зайсан айналма жолымен – Қалбатау – Семей – Павлодар – РФ шекарасы» автожолының 910-1002 шақырым аралығындағы учаскесінде (Қалбатау а. – Көкпекті а.) көлік қозғалысына шектеу қойылды.
Жолды 2025 жылғы 25 наурыз сағат 06:00-де ашу жоспарланған.
Сол сияқты Шығыс Қазақстан облысында да жол қозғалысына шектеу енгізілді.
«2025 жылғы 24 наурыз сағат 22:30-да ауа райының бұзылуына байланысты «Өскемен – Алтай – Үлкен Нарын – Катонқарағай – Рахман қайнары» автожолының 6-166 шақырым аралығындағы учаскесінде (Ушановское ауылынан Алтай қаласына дейін) көліктердің барлық түрінің қозғалысына шектеу қойылады», - делінген «ҚазАвтоЖол» хабарламасында.
