Астана.25 сәуір.ҚазТАГ- Ондаған АК, гранаталар мен жарылғыш құрылғылар - ҰҚК жыл басынан бері табылған заңсыз қарулар туралы есеп берді, деп хабарлайды агенттік тілшісі.
“2023 жылғы қаңтар мен сәуір аралығында Ұлттық қауіпсіздік комитеті полиция органдарымен бірге прокуратураның үйлестіруімен заңсыз қару айналымындағы қаруды іздестіру және тәркілеу бойынша, оның ішінде "қаңтар оқиғалары" кезінде ұрланған қаруға қатысты бірқатар жедел-іздестіру іс-шараларын жүргізді. Нәтижесінде Қазақстанның 11 аймағында 268 бірлік қару, оның ішінде 38 "Калашников" автоматы, 126 мылтық, 104 тапанша, 21 граната, 4 жарылғыш құрылғы, түрлі калибрлі 30199 оқ-дәрілер, сонымен қатар броньды кеудеше, қорғаныш дулығасы, қол-кісендер, автомат оқжатарлары, қалқандар мен радиостанциялар тәркіленді”, – делінген сәрсенбіде тараған ақпаратта.
Жедел қызметкерлер жасырылған қару мен оқ-дәрілердің негізгі бөлігін мына жерлерден анықтаған: Алматыда – 4, Байқоңырда – 1, Қостанайда – 1, Семейде – 1, Өскеменде – 1, Ақтөбеде – 1, Алматы облысында – 3, Жамбыл облысында – 4, Жетісу облысында – 2, Павлодар облысында – 1, Солтүстік Қазақстан облысында – 3.
“Бұдан басқа, бұрын хабарлағанымыздай Алматы қаласында қарудың заңсыз айналымымен ірі көлемде айналысып келген қылмыстық топ әрекетінің жолы кесілді. Аталған факт бойынша сотқа дейінгі тергеу жүргізілуде. Заңсыз айналымдағы қаруды іздеу мен тәркілеу жалғасуда”, – деп қосты ҰҚК.
Ондаған АК, гранаталар мен жарылғыш құрылғылар - ҰҚК жыл басынан бері табылған заңсыз қарулар туралы есеп берді
