Ресей Федерациясының Челябі облысындағы Аша қаласын су басты, - деп хабарлайды Massaget.kz тілшісі Ресей ТЖМ-ге сілтеме жасап.
Бұл аймақ Қазақстанның Қостанай облысымен шектеседі.
Қаладағы су басқан көшелерден 70 адам, соның ішінде 20 бала эвакуацияланды.
"Сим өзенінде мұз кептелуі мен жауын-шашын салдарынан су деңгейі көтерілді, бұл Аша қаласындағы Матросов, Набережная, Октябрьская, Заречная көшелеріндегі 31 шаруашылық телімін су басуға әкеп соқты", - деп жазылған хабарламада.
Сим өзенінің арнасы экскаватор, манипулятор көмегімен тазартылған.
"Матросов, Октябрьская, Заречная көшелеріндегі су деңгейі 1 метрге төмендеді, 15 тұрғын үй мен жеке учаскелер судан тазартылды. Тағы 16 тұрғын үй мен жер телімі су астында қалды", - деп жазылған ақпаратта.
Ресейлік ТЖМ мәліметінше, төтенше жағдайға Ресей ТЖМ қызметкерлері, өңірдің іздестіру-құтқару қызметінің бөлімшелері, мамандандырылған өрттен құтқару бөлімінің күштері жұмылдырылған.
Айта кетейік, бұған дейін Қостанай облысының билігі наурызда, сәуірдің басында ауа температурасы +17 градусқа дейін көтеріледі деген болжамға байланысты ескерту жасады. Дегенмен ірі су тасқыны болжанған жоқ.
Өзекті жаңалықтарды өз уақытында оқу үшін Facebook парақшамызға жазылыңыз!
Ж. Қадыржанова