Chevrolet Cobalt – арзан сегментіндегі кең таралған модельдердің бірі. Дегенмен сапасы мен сенімділігіне қатысты сұрақтар туындайды. Жақында әлеуметтік желіде автокөлік иесінің бөліскен тәжірибесі Cobalt таңдаған жүргізушілер үшін маңызды ескерту бола алады.
Автокөлік иесі өзінің пікірінде Cobalt-тың алғашқы уақытта қала ішінде қатынауға ыңғайлы болғанын айтады. Жанармайды үнемді тұтынады, техникалық қызмет көрсету көп шығынды қажет етпейді. Бұл тұрғыда ол өз міндетін атқарады.
"2024 жылдың 4 сәуірінде Chevrolet салонынан жаңа Cobalt автокөлігін алып шықтым. Күніне үй мен жұмыстың арасын жүріп өтіп, айына бір-екі рет трассаға шығып тұрады. Бірақ 2025 жылдың 26 қаңтарында небәрі 14 000 км жүрген соң, генератор істен шықты. Эвакуатор шақырып, сервиске жеткізуге тура келді. Кейін бұл ақау көп жүргізушілерде кездесетін ортақ мәселе екенін білдім", – деп жазады Threads әлеуметтік желісінің қолданушысы.
Генератордың бұзылуы – бұл техникалық ақау ғана емес. Сонымен бірге иесіне қаржылық және моральдық ауыртпалық алып келетін жағдай. Бұл Cobalt автокөлігінің ұзақ мерзімді пайдалану кезінде сенімсіз болатынын көрсетеді.
"Cobalt-ты ұсынбаймын. Басқа үлкен мәселе болған жоқ, бірақ бұл көлік өз құнын ақтамайды", – дейді автокөлік иесі.
Көптеген жүргізушілердің айтуынша, Cobalt ішкі жабдықталуы мен жайлылығы жағынан орташа деңгейде. Салон дизайны қарапайым, заманауи технологиялар мен қосымша функциялар жетіспейді. Бұл көлікпен жүріп-тұру көбіне функционалдылыққа негізделген, ал көлік жүргізу рахатынан гөрі қажеттілік сезіледі.
