Грек-рим күресінен Қазақстан құрамасының өкілі Шамиль Ожаев Азия чемпионатында қола жүлде жеңіп алып, ел қоржынына екінші медаль салды.
Шамиль Ожаев 87 келіге дейінгі салмақ дәрежесінде үшінші орын үшін өткен белдесуде Оңтүстік Корея балуаны Сан Хёк Пакпен кездесті. Жекпе-жек нәтижесінде қазақстандық балуан қарсыласын 5:1 есебімен жеңіп, құрлықтық додада жүлдегер атанды.
Айта кетейік, бұған дейін 77 келіде Ибрагим Магомадов та қола медаль жеңіп алған. Осылайша Қазақстан құрамасы Азия чемпионатында екі бірдей жүлдеге қол жеткізіп отыр.
Сонымен қатар 130 келі салмақта күрескен Алимхан Сыздыков финалға жолдама алып, алтын медаль үшін белдесетін болады. Оның шешуші айқасы жақын күндері өтеді.
