Алуа Балқыбекова: Әкеме көлік сыйласам деймін

Бокстан Сербияда өткен әйелдер арасындағы жаһандық додада әлем чемпионы атанған Алуа Балқыбекова «Спорт министрі» арнасына берген сұхбатында сыйақысын қайда жұмсайтынын айтты.

• Бастапқыда Тараз қаласында тұрдық. Кейін анам өмірден өткен соң, Алматы қаласына көшуге шешім қабылдадық. Ол жақтағы пәтердің бағасы Тараздан қарағанда әлдеқайда қымбат. Сондықтан үйді арнайы бағдарламамен алуға тура келді. Қаржылық жағынан қиынға соқты. Тіпті әкем несиені өтеп, менің әлем чемпионатына баруым үшін, көлігін сатып жіберді. Енді мен де әкеме көлік сыйласам деймін, - деді Алуа

Айта кетейік, Алуа Балқыбекова 2022, 2023, 2025 жылғы әлем чемпионаттарына қатысып, барлығында жүлде тұғырына көтерілген болатын.

Сербияда ұйымдастырылған жаһандық бәсекеде IBA ұйымы чемпиондарға 100 мың АҚШ долларын беруге шешім қабылдаған еді.