Әлем кубогы: Екінші жарыс күні қалай өтті?

Бокстан World Boxing ұйымы өткізіп жатқан Әлем кубогының екінші жарыс күні Қазақстан құрамасы үшін сәтсіз өтті.

Ерлер бәсекесінде боксшыларымызды Бразилия өкілдері сан соқтырды. 60 келіге дейінгі салмақ дәрежесінде Талғат Сырымбетов Луис Оливейраға (0:5) есе жіберсе, 65 келіде Алмат Абдуали Юри Рейске (0:5) жол берді.

Одан бөлек 50 келі салмақ дәрежесіндегі Қазақстан – Өзбекстан текетіресінде Нұрзат Оңғаров 2024 жылғы Азия чемпионы Асилбек Жалиловтың (0:5) мықтылығын мойындады.

Ал қыздар арасында 54 келіде жұдырықтасқан Анита Адишева польшалық Виктория Рогалинскаға (0:5) есе жіберді.

Бұл күні көңілге медеу болған жалғыз былғары қолғап шебері – Даниял Сапарбай. 90+ келіде күш сынаған ұлттық құрама спортшысы Үндістандық Нарендер Нарендерді 3:2 есебімен жеңіп, жартылай финалға жолдама алды.

Айта кетейік, дүбірлі дода 5 сәуірге дейін жалғасады.