Мемлекет басшысы Жәнібек Әлімханұлын жеңісімен құттықтады

Мемлекет басшысы Қасым-Жомарт Тоқаев кәсіпқой боксшы Жәнібек Әлімханұлын орта салмақта WBO және IBF тұжырымдары бойынша чемпиондық белбеулерін сәтті қорғауымен құттықтады.

Бұл туралы ҚР президентінің кеңесшісі Руслан Желдібай жеке Telegram-арнасында хабарлады.

— Қасым-Жомарт Тоқаев спортшының жоғары деңгейдегі шеберлігі мен табандылығы, туған жерімізде ел намысын абыроймен қорғауы баршамыз үшін зор мақтаныш екенін атап өтті. Президент Жәнібектің бұдан да үлкен жеңістерге жете беруіне тілектестік білдірді,– делінген мәлімдемеде.

Айта кетейік, Жәнібек Әлімханұлы (16-0, 11 КО) Астанада өткен бокс кешінде франциялық Анауэль Нгамиссенгені (14-1, 9 КО) бесінші раундта нокаут арқылы жеңіп, IBF және WBO тұжырымдамалары бойынша орта салмақтағы чемпиондық белбеулерін қорғады.