Жәнібектен қашқан Хамза Шираздың келесі қарсыласы анықталды

Орта салмақтан екінші орта салмаққа ауысқан британдық Хамза Шираздың (21-0-1, 17 КО) қарсыласы белгілі болды, деп хабарлайды Sport12.kz

Ring Magazine басылымының хабарлауынша, Шираз 12 шілде күні Нью-Йоркте өтетін Inside the Ring атты шоу аясында рингке шығады. Оның қарсыласы — пуэрторикалық Эдгар Берланга (23-1, 18 КО) болмақ.

Айта кетейік, бұған дейін Хамза Шираз WBO және IBF тұжырымдары бойынша орта салмақтағы әлем чемпионы, қазақстандық Жәнібек Әлімханұлына (17-0, 12 КО) қарсылас ретінде қарастырылған. Ол тіпті "Қазақ стилімен" жекпе-жек өткізуге дайын екенін ашық мәлімдеген болатын. Алайда, кейінірек бұл кездесуден бас тартып, бір салмақ жоғары көтерілу туралы шешім қабылдады.

Ал оның алдағы қарсыласы - Эдгар Берланга өткен жылдың қыркүйек айында екінші орта салмақтағы әлем чемпионы, мексикалық Сауль "Канело" Альвареспен (62-2-2, 39 КО) жекпе-жек өткізіп, төрешілердің бірауыздан шығарған шешімімен жеңіліс тапқан болатын.