Қазақстан құрамасы Кюрасаоны жеңді, алда - Уэльс

Футболдан Қазақстан ұлттық құрамасы Түркия жерінде өтіп жатқан оқу-жаттығу жиыны аясында жолдастық кездесуде Кюрасаоны 2:0 есебімен тізе бүктірді.

Ойынның 15-минутында Максим Самородов есеп ашса, 36-минутта Асхат Тағыберген айып соққысымен есепті еселеді.

Екінші кезеңде қарсыластар бір-бірінің қақпасынан саңылау таба алған жоқ. Осылайша Қазақстан құрамасы қарсыласынан 2:0 есебімен басым түсті. 

Енді қазақстандық футболшылар 2026 жылғы әлем чемпионаты іріктеу сатысында алдағы екі ойынын өткізеді. Алдымен Қазақстан құрамасы 22 наурызда сырт алаңда Уэльспен кездессе, 25 наурызда Лихтенштейнге қарсы ойнайды.

2026 жылғы әлем чемпионаты іріктеу сатысында Қазақстан құрамасы J тобында сынға түседі. Қарсыластары — Бельгия, Уэльс, Солтүстік Македония және Лихтенштейн.

Матчтар 2025 жылдың наурызында басталып, қараша айында аяқталады.