Қазақстан жасөспірімдер құрамасы екі кездесуде сегіз гол соқты

Футболдан 17 жасқа дейінгі Қазақстан жасөспірімдер құрамасы Еуропа чемпионаты екінші іріктеу сатысын сәтті өткізді.

Олар екінші ойында Литва құрамасымен жасыл алаңға шықты. Кездесу барысында Исмаил Бекболат 58, 80, 89-минутта үш гол соғып, хет-триктің авторы атанды. Ал Абылай Төлеухан 21, Дәулет Орынбасар 75-минутта бір-бір голдан соқты. Оған литвалық футболшылар екі голмен жауап қайырды.

Осылайша қарсыласынан 5:2 есебімен басым түскен қазақстандық футболшылар өз тобындағы ойындарды екі жеңіспен бірінші орында аяқтады.

Айта кетсек, бұдан бұрын олар Грузияны 3:0 есебімен тізе бүктірген еді. Бұл ойында Дәулет Орынбасар 48, 75, Исмаил Бекболат 55-минутта мергендік танытты.

Нәтижесінде қазақстандық футболшылар екі кездесуде сегіз гол соғып, жоғары нәтижеге қол жеткізді.