Азия чемпионатында қазақстандық бір балуан алтынға таласады

Иордания астанасы Амман қаласында өтіп жатқан Азия чемпионатында грек-рим күресінен бір балуан финалға шықса, төртеуі қолаға таласады.

Ел құрамасынан Әлімхан Сыздықов (130 келі) финалға дейін Ирак, Өзбекстан балуандарын жеңді. Финалда оған Иран спортшысы қарсылас атанды.

Ал Ербол Қамалиев (55 келі) 1/4 финалда Ирак балуанына есе жіберді. Жұбаныш белдесуінде жеңіске жеткен ол енді қола жүлдені өзбекстандық балуанмен сарапқа салады.

Сондай-ақ Сұлтан Әсетұлы (63 келі) екі қарсыласын қапы қалдырғанмен жартылай финалда өзбекстандық Айтжан Халмахановтан жеңіліп қалды. Енді ол Солтүстік Корея спортшысымен қола медальға таласады. 

Қазақстандық тағы бір балуан Ибрагим Магомадов (77 келі) бірінші белдесуінде оңтүстіккореялық балуанды жеңді. Одан кейін Өзбекстан балуаны Адам Варданянға есе жіберді. Енді Ибрагим үшінші орын үшін Иордания балуанымен бозкілемге шығады.

Ел құрамасынан Шамиль Ожаев (87 келі) ширек финалда қырғызстандық спортшыны тізе бүктірді. Ал жартылай финалда өзбекстандық балуаннан жеңіліп қалды. Алдағы белдесуде ол Оңтүстік Кореядан келген спортшымен шеберлік байқасады.