Бауыржан Тұрысбек Дастан Сәтпаевтың бала кезде қандай болғанын айтты

Футболдан Қазақстан құрамасының бұрынғы жартылай қорғаушысы Бауыржан Тұрысбек Дастан Сәтпаевтың балалық шағын өз көзімен көргені туралы айтып берді.

Бұл туралы ол «Спорт Пульс» Youtube-арнасындағы подкастта сөз қозғады.

– 2018 жылы Алматыдан пәтер алып, Дастанмен көрші тұрдым. Біз бірге аулада жиі доп тебетінбіз. Ол сол кезде «Қайраттың» жейдесін тастамай киіп жүретін. Футбол ойнағанда оның допты жақсы игеретінін бірден байқадым. Екі аяғымен де шебер ойнайтын. Жастайынан сенімді ойын көрсетті. Сол кезде әйеліме: «Бұл баланың болашағы жарқын. Шетелдік клубқа ауысатынына сенімдімін», – деген едім, – деді Бауыржан Тұрысбек.

Еске салсақ, жуырда Дастан Сәтпаев ағылшындық «Челси» клубының ойыншысы атанды. Лондондық клуб «Қайраттың» шабуылшысын 4,3 миллион еуроға сатып алды. Алайда Дастан кәмелеттік жасқа толғанға дейін алматылық клуб сапында ойнауын жалғастырады.