Софья Самоделкина: Әлем чемпионаты ойымдағыдай болмады

Қазақстан өкілі Софья Самоделкина Бостондағы әлем чемпионатындағы өнеріне көңілі толмағанын мәлімдеді, деп хабарлайды Sport12.kz «Матч ТВ»-ға сілтеме жасап.

Бұған дейін Қазақстан атынан өнер көрсеткен Самоделкина 181,36 ұпай жинап, 14-орынға ие болған еді.

— Қазір көңіл-күйім түсіп тұр. Өйткені мен өте көп жұмыс істедім. Ал соңғы комбинациям өзім күткендей болмады. Осы маусымнан түйгенім – жаттықтырушыларымның айтқандарын одан да мұқият тыңдап, жақсырақ орындауым керек. Қазір мен АҚШ-қа көшіп, толыққанды түрде Рафаэль Арутюнянмен жұмыс істеп жатырмын. Ол бапкер ретінде өте ұнайды. Мен өте көп еңбектеніп, барлық жағынан, әсіресе секірулер мен техникалық орындауда жетілгім келеді. Келесі маусым – олимпиадалық, бұл өте маңызды, – деп келтіреді Самоделкинаның сөзін Goldenskate.

Чемпион атағын америкалық Алиса Лю (222,97 ұпай) жеңіп алды. Екінші орынды жапондық Каори Сакамото (217,98), ал үшінші орынды жапондық Моне Чиба (215,24) иеленді.