27.03.2025
Тимофей Скатов Испаниядағы турнирді жеңіспен бастады
Азамат Бақи
Қазақстандық теннисші Тимофей Скатов Испанияның Жирона қаласында өтіп жатқан ATP Challenger турнирінің екінші айналымына сүрінбей өтті.
Жарыстың 1/16 финалында Тимофей Скатов (АТР: 175) боливиялық теннисші Уго Дельенді (АТР: 103) тізе бүктірді.
Қос теннисші арасындағы кездесу 1 сағат 22 минутқа созылды. Нәтижесінде отандасымыз қарсыласынан 2:0 (6:1; 6:3) есебімен басым түсті.
Енді Тимофей келесі кезеңде молдовалық теннисші Раду Алботпен (АТР: 189) ширек финал жолдамасын сарапқа салады. Аталған кездесу бүгін, 27 наурыз сағат 14:30-ға жоспарланған.
Айта кетейік, дүбірлі доданың жалпы жүлде қоры 145,250 еуроны құрайды.
