Александр Бублик Италиядағы турнирде алысқа бармады

Қазақстанның бірінші ракеткасы Александр Бублик Италия астанасы Римде өтіп жатқан Internazionali BNL d'Italia ATP Masters 1000 турнирінің екінші айналымынан әрі аса алмады, деп хабарлайды Sport12.kz.

Жарыстың 1/32 финалында Бублик (АТР: 76) Мадридтегі турнирдің чемпионы норвегиялық Каспер Руудқа (АТР: 7) жол берді.

Грунт төсенішіндегі кортта өткен қос теннисші арасындағы кездесу 1 сағат 58 минутқа созылды. Осы уақыт ішінде Бублик 15 эйс жасап, 2 брейк поинттың екеуінде рәсімдеп, 5 мәрте қос қателікке бой алдырды. Алайда, матч нәтижесінде отандасымыз қарсыласына 1:2 (4:6; 6:4; 3:6) есебімен есе жіберді.

Айта кетейік, дүбірлі доданың жалпы жүлде қоры 8 055 385 еуроны құрайды. Ал Бублик екінші айналымға дейін жеткені үшін 30 рейтингтік ұпай мен 30 895 еуроға ие болды.