Медиаменеджер
Елге танымал азамат, әріптесім Ғалымжан Елшібайдың журналистік шеберлігіне баға берместен, бұл істі қалың оқырманның еншісіне қалдырғанды жөн көріп отырмын.
Бірақ мына нәрсені айтып өткім келеді: Оңтүстік өңіріндегі аудандық, қалалық, облыстық газеттерде жұмыс істегенін айтпағанның өзінде, ұлттық журналистиканың маңдайалды басылымдары – Egemen Qazaqstan, «Жас Алаш», «Қазақ әдебиеті», «Ана тілі» секілді көпжылдық тарихы бар газеттерде ұзақ жыл бойы меншікті тілші болып қызмет атқару – екінің біріне бұйыра бермейтін мәртебе, журналистің шын мәнінде ерекше талант иесі екенінің айқын дәлелі болса керек. Өзіндік қолтаңбасы бар мықты журналист болмаса, отандық журналистиканың бетке ұстар басылымдарында жемісті еңбек ету мүмкін емес деп білемін.
Мені Ғалекең медиаменеджер ретіндегі керемет ұйымдастырушылық қабілеттерімен ерекше тәнті етті. Түркістан облысы – мен жұмыс істеп келе жатқан алтыншы өңірім. Бұған дейін Қызылорда, Батыс Қазақстан, Маңғыстау, Атырау, Алматы облыстары мен Алматы қаласындағы ақпарат құралдарында қызмет атқардым. Әлбетте, жүрген жерде жергілікті журналистік ортамен етене араласамыз. Бұл аймақтардың барлығында Қазақстан Журналистер одағының филиалдары болды. Бірақ осы ұйымның өз деңгейінде жұмыс істегенін тек Түркістанға келгенде ғана көрдім. Көрдім де таңғалдым. Басқа облыстардың барлығында дерлік Одақ филиалдарының жұмысы тым нашар, формальды түрде ғана атқарылатын. Әдетте, журналистер қауымы жылына бір рет, Одақтың мүшелігіне қабылданған әріптестерге куәліктерді тапсырғанда ғана бас қосады. Билік өкілдері мен қарапайым халық былай тұрсын, Қазақстан Журналистер одағының филиалы бар-жоғын журналистердің өздері де дұрыстап білмейтін, басшысын танымайтын да еді.
Ал Түркістанда мүлдем басқаша. Еліміздің рухани астанасына жұмыс бабымен 2022 жылы ауыстым. Өзге аймақтардағы мүлгіген тыныштықтың жанында Журналистер одағы Түркістан облыстық филиалы – нағыз құж-құж қайнаған қазан, тынымсыз тіршіліктің ортасы іспетті. Қандай да жиын, басқосу, мерекелік іс-шаралар болсын, барлығында да Ғалымжан Елшібай бастаған Журналистер одағының аты аталады. БАҚ қызметкерлері күні мерекесіне орай дәстүрлі Спартакиада әрдайым жоғары деңгейде әрі тартысты өтіп жүрді. Одан бөлек түрлі аймақаралық, республикалық деңгейдегі форумдар жиі ұйымдастырылады. Тіпті, қасиетті Ораза айында журналистердің басын қосып, ауызашар өткізудің өзі әріптестерге деген жанашырлықтың, кәсіби ортада ынтымақ-береке орнатуға ұмтылыстың белгісі емей немене?! Міне, осы бастамалардың барлығының ұйытқысы ретінде Ғалымжан Елшібай жүреді. «Одақтың жұмысын осындай деңгейде жүргізуге болады екен-ау» деп қайран қалғаным рас.
Бұл – Ғалекеңнің еңбегі, қоғамдағы, әріптестер ортасындағы белсенділігінің нәтижесі. Өте бастамашыл азамат. Журналистерге қатысты кез келген мәселеге араласады, қиындыққа тап болған әріптестерге қол ұшын созады, қандай мәселеде болсын қорғайды. Бұған өзім талай рет куә болдым.
Ғалекеңнің бір ерекшелігі – журналистикадағы аға буын өкілдеріне құрмет көрсетуге, арамыздан кеткен марқұм журналистерді еске алуға айрықша назар аударады. Спорттық жарыс болсын, қасиетті Оразада берілген ауызашар болсын, форумдарда әріптестерді марапаттау болсын – әрдайым бақилық болған әріптестердің есімдерін ұмыт қалдырмай, жаңғыртып отырады. Марқұм әріптестерге дұға бағыштауды ұмытпайды.
Мені ерекше толқытқан бастама – ХҚТУ журналистика факультетінің студенттеріне Бейсен Құранбектің атындағы стипендияның берілуі. Бұл бір реттік шара емес, жыл сайын өтетін дәстүрге айналған жоба. Әрине, ұлттық журналистика саласында жұлдыздай жарқырап өткен, телевизия саласындағы өзіндік стилімен, қайталанбас жолымен талайларды еліктірген Бейсен Құранбек – бүкіл қазақтың мақтанышы. Дегенмен марқұмды еске алуға арналған мұндай бастамаларды басқа аймақтарда көріп, естімеген едім. Бар болса Бейсекеңнің туған жері – Жетісу өңірінде бар шығар. Ал Түркістанда Бейсен Құранбектің есімі жылда аталып отырады. Осы игі бастамаға мұрындық болғаны үшін Ғалымжан Елшібайға айрықша алғысымды білдіремін. Үздік студенттерге Бейсен Құранбек атындағы стипендия беруге демеуші болуды бастапқыда Ғалекең өзі бастап берсе, одан кейін руханиятқа жанашыр жандарды жұмылдырып жүр. Ал алдыңғы жылы үш студентке берілетін стипендияға Turkistan медиахолдингі демеуші болды. Тағы айта кетерлігі, бұған дейін Журналистер одағы Түркістан облыстық филиалының үздік БАҚ өкілдеріне тапсыратын марапаттарының арасында Бейсен Құранбек атындағы номинация да берілген екен. Курстас досына, әріптеске адалдықтың үлгісін көрсеткен Ғалымжан Елшібайдың бұл бастамасы болашақ журналистерге үлкен серпін мен мол шабыт берері сөзсіз.
Журналистер одағы облыстық филиалы төрағалығының тізгінін ұстаған бес жылдың бедерінде түркі әлемінің қарашаңырағы атанған қасиетті Түркістанда түрлі халықаралық және республикалық, өңірлік медиафорумдар мен семинарлар, кездесулер өткізілуіне мұрындық болған Ғалымжан Қамытбекұлы өңір журналистикасының сапасын арттыруға, заманауи стандарттарға сай болуына орасан еңбек сіңірді. Белсенділігі жоғары, өте бастамашыл азамат болуы өз алдына, Ғалекең журналистикаға шынайы жанашырлықпен қарайды. Сондай жанашырлық барлық өңірлерде болса, әріптестеріміздің ынтымақ-бірлігі әлдеқайда мықтырақ болар еді деген ойдамын.
Бір мысал. «Масс медиа» туралы заң жобасы талқыланып жатқан кезде негізгі ұсыныстарды жүйелі түрде Алматы мен Астананың журналистері жолдап жатты. Әрине, өңірлердегі әріптестеріміздің де арасында талқылаулар болды. Дегенмен ауызша ой-пікір айту бір бөлек те, салалық министрлікке жазбаша ұсыныс жолдау мүлдем басқа шаруа. Осы ретте Ғалекеңнің бастамасымен «Алатау медиа» орталығында келелі басқосу болып, журналистерге тікелей қатысы бар заң жобасы жан-жақты талқылаудан өтті. Жиынға өңіріміздің әр аудан, қалаларынан келген әріптестер ғана емес, онлайн форматта Парламент Сенатының депутаттары, Ақпарат және қоғамдық даму министрлігінің жауапты мамандары да қатысты. Бұл да Ғалымжан Қамытбекұлының абырой-беделінің көрінісі болар. Басқосуда айтылған ой-пікірлер хаттамаға енгізіліп, жүйеленген ұсыныстар Қазақстан Журналистер одағы Түркістан облыстық филиалының атынан министрлікке жолданған болатын. Осының өзі Ғалекеңнің елдік маңызға ие мәселелерге тиянақтылығын, талапшылын көрсетеді.
Сондықтан да Ғалымжан Елшібайдай азаматтың сегізінші шақырылымдағы облыстық мәслихатқа депутат болып сайлануын қос қолдап қолдадық. Жетінші шақырылымда да халық қалаулысы атанды. Депутаттың да депутаты бар. Өкінішке қарай мандатты қарақан басының күйін күйттеу үшін пайдаланатындар да кездеседі. Енді бір нарқасқа жігіттер бар, олар үшін депутаттық қызмет – елге қызмет етудің мүмкіндігі.
Ғалекеңді біліп, танығалы да біраз болды ғой. Тек журналистикамен жүргенінде жарғақ құлағы жастыққа тимей жұмыс істеген азаматтың елдік мәселелерге келгенде белсенділігі артпаса, кемімейтіні анық. Расында да, Ғалекеңнің таңертең Төлебиде, түсте Түркістанда, кешке Келесте депутат ретінде жұрттың ортасында күйіп-пісіп мәселе шешіп жүргенін талай көрдік. Біздің телеарнаға деген жанашырлығын да танытты. Депутат ретінде келіп, холдингтегі қиындықтарды шешуге қол ұшын созды. Қайбір жылы телеарна қаржы тапшылығына тап болып, қызметкерлер айлығын ала алмай жүргенде де белсене араласып, мәселенің шұғыл түрде шешілуіне ықпал еткен болатын.
Ғалекеңдей азамат үшін депутат болу мәртебе емес, халыққа қызмет етудің мүмкіндігі, құралы. Мәслихаттың әр сессиясында, тұрақты комиссиялардың отырыстарында депутат Ғалымжан Елшібайдың өткір сұрақтарды жолдайтынын, күрделі мәселелер бойынша қозғау салып, жауапты шенеуніктерден тиянақты да нақты жауаптарды талап ететінін көріп отырамыз. Ел мүддесі үшін бастаған ісін соңына дейін жеткізетін табандылығына сүйсінеміз. Журналистік ортадан шыққан осындай белсенді де жанашыр депутаты бар сайлаушылар ешқашан ұтылмайтыны сөзсіз.
Жанахмет АҒЫБАЕВ,
«Turkistan Media Holding» ЖШС Бас директоры
