Кеше Алматыдағы әл-Фараби атындағы Қазақ ұлттық университетінде Орталық Азия елдері ректорларының Бірінші халықаралық форумы өтті. Халықаралық іс-шараға Тәжікстан, Өзбекстан, Түрікменстан, Қырғыз елдерінен білім, ғылым саласы министрліктерінің өкілдері мен ЖОО ректорларынан құралған делегациялар қатысты.
Форумның ашылу салтанатында сөз сөйлеген еліміздің Білім және ғылым министрі Асхат Аймағамбетов барлық қатысушы мен қонақтарға жылы лебізін білдірді. Министр өз сөзінде Орталық Азия ЖОО-лар арасында білім мен ғылымды дамытуға басымдық беріп, озық бағыттар бойынша сапалы зерттеулер жүргізу қажетін айтып өтті. Сондай-ақ ол жаңа ғылыми инновацияларды енгізуге байланысты қарым-қатынастарды нығайтуды алға тартты.
Министр Қазақстанның жоғары білім беруді дамытудағы жетістіктеріне тоқтала келе, Қазақстанның 14 ЖОО әлемдік рейтингтердің қатарында екенін атап өтті. Оның сөзінше, еліміз Болон процесінің белсенді қатысушысы. Қазақстандық ЖОО-ларда жұмыс берушілердің сұранысына жауап беру мақсатында университеттер тарапынан әзірленіп жатқан білім беру бағдарламаларының тізілімі айтарлықтай кеңейтілді. Бұл жоғары білімнің практикалық бағыттылығына оң әсерін тигізеді.
Білім министрі сондай-ақ Орталық Азия өңірі (ОА) елдерінің 150 студенті үшін «Әл-Фараби» мамандығы мен бағдарламасын даярлап, сондай-ақ PhD бағдарламалары бойынша гранттар бөлу жоспары бар екенін айтып өтті. «Менің ойымша, бүгінде Орталық Азия студенттерінің Біріккен Одағын құру мәселесі аса өзекті және форум барысында осы және басқа да бірқатар бастама бойынша пікір алмасудың тамаша мүмкіндіктері болады», – деген сенім білдірді министр.
«Орталық Азия ректорларының Бірінші форумына қатысушылардың бүгінгі құрамы оның ойдағыдай өткенін айғақтайды. Бұл формат университетаралық байланыс алаңы ретінде сұранысқа ие болатынына сенімдіміз», – деді өз сөзінде Өзбекстан Республикасы Жоғары және орта арнаулы білім министрінің бірінші орынбасары Комилжон Каримов.
Спикердің айтуынша, мұндай іс-шаралар, соның ішінде 2020 жылы өткен Орталық Азия елдері білім министрлерінің конференциясы сияқты өзара тиімді ықпалдастық орнатуға мүмкіндік беретін халықаралық, өңіраралық және университетаралық байланысты жандандыруға серпін береді. Қазір Өзбекстанда жоғары білім беру саласында жүзеге асырылып жатқан ауқымды реформалар туралы айта келіп, Каримов мырза форум ұйымдастырушыларына ризашылығын білдіріп, шараның жемісті болатынына сенім білдірді.
Форум барысында сөз алған әл-Фараби атындағы ҚазҰУ-дың басқарма төрағасы – ректоры Жансейіт Түймебаев Орталық Азиядағы ғылыми ұйымдар мен университеттер арасындағы ынтымақтастықты кеңейту және озық тәжірибе алмасудың маңыздылығын және бүгінгі форумдағы диалогтің болашақ ұрпақтың экономикалық тұрақтылығы мен өмір сүру сапасына қосқан зор үлес болатынын атап өтті.
«Күні кеше ғана Түркияның Ыстанбұл қаласында әл-Фараби атындағы ҚазҰУ-дың филиалын аштық. ҚазҰУ Орталық Азия университеттерімен тығыз байланыс орнатып, ынтымақтастық туралы 30-ға жуық келісімге қол қойған. Сонымен қатар биылғы жылдың 26 мамырында Қазақстан Президентінің Қырғыз Республикасына сапары аясында Бішкек қаласында университетіміздің филиалын ашу жоспарланып отыр», – деді Ж.Түймебаев. Кеңейтілген пленарлық отырыста Қырғыз Республикасы Білім және ғылым министрінің орынбасары Расул Абазбек уулу, Тәжік ұлттық университетінің ректоры Хушвахтзода Хушвахт және тағы басқалар баяндама жасады.
Халықаралық шара аясында «Жаһандық бәсекеге қабілеттілік, ЖОО ұжымы мен студенттерінің ұтқырлығы» және «Жоғары оқу орындарының цифрлық трансформациясы және Орталық Азия елдері зерттеу кеңістігінің интеграциясы» тақырыбында сессиялар өтті. Ол жерде орталықазиялық жоғары оқу орындарының өкілдері өз ұйымдары негізінде екі ел үшін бірлескен зерттеулер қалай жүргізілетіні туралы тәжірибелерімен бөлісті. Сонымен қатар екіжақты ынтымақтастықты нығайтудың мәселелерін талқылады. Форум жұмысының соңында Орталық Азияда орналасқан 19 ЖОО-лар арасында екіжақты маңызды бағдарламалық құжаттар мен келісімдерге қол қойылады.
