«Республика көлемінде өтіп жатқан бұл фестивальдің рухани маңызы зор. Мұнда кітапсүйер қауым кітап жәрмеңкесіне қатысып, өзіне ұнаған туындыларды сатып алып қана қоймай, ақын-жазушылармен дидарласып, сұхбаттаса алады, жаңа авторлармен танысып, поэзиялық кештің көрермені болады. KitapTime фестивалі әрі қарай да жалғасын табуы керек», – деді министр.Йел университетінің ғалымдары үнемі кітап оқуды әдетке айналдырған адамдар ұзақ өмір сүреді деген қорытындыға келген. Шынында, кітап – қазына. Ал көркем әдебиеттің жөні мүлдем бөлек. «Отандастар қоры» КЕАҚ ұйымы «Әр қазаққа – бір кітап» жобасының аясында алыс-жақын шетелде тұратын қазақтарға кітап сыйлау акциясын жариялады.
Фестиваль шеңберінде кітап көрмесі, жәрмеңке, буккросинг, «АвтографTime», KazakhComic, «Журналистің қоғамдық миссиясы» атты бас редакторлармен кездесу, поэзия рarty, блогерлер құпиясы, OYNA балалар институтымен бірлескен «Оқимыз, жазамыз, сурет саламыз!» шарасы өтті.
«Бүгін KitapTime фестивалі республикалық деңгейде бастау алды. Биыл әдебиет, мәдениет, қолөнердің барлық саласын қамтуға, бір жерге тоғыстыруға, түрлі локация жасауға тырыстық. Келер жылы шараның ауқымын кеңейтіп, түрлі идеяларды жүзеге асыру жоспарымыз бар. Мәселен, әр автордың, қаламгердің қолындағы сирек қорлардың көрмесін ұйымдастыру, оны халықаралық деңгейде өткізгіміз келеді», – деп атап өтті Ұлттық академиялық кітапхана директоры Ғазиза Құдайбергенқызы.Кітап көрмесінде 28 мемлекеттің еліміздегі елшіліктері оқырманды рухани қазынасымен таныстырды. Қырғыз елінің әдебиетшілері «Манас» эпосын, Шыңғыс Айтматовтың шығармаларын және тағы басқа көркем туындыларын жиналған жұрт назарына ұсынды әрі Ұлттық кітапхананың қорына сыйлыққа табыс етті.
«Ұлттық академиялық кітапхананың шақыртуымен осы шараға қонақ болып отырған жайымыз бар. Бүгінгі көрмеге азын-аулақ кітаптарымызды әкелдік. Оның ішінде жас әдебиетшілердің туындылары көп. Мақсат – оларды қазақ аудиториясына таныстыру. Қазақ-қырғыз бауырлар сонау заманнан бір-бірінің әдебиетімен, мәдениетімен етене таныс болған. Бүгінгі ұрпақтың арасында да осы сабақтастықты кеңінен насихат қылып, кітап оқу мәдениетін қалыптастыруымыз керек», – деді Қырғыз Республикасының Қазақстандағы елшісінің кеңесшісі Алмасбек Ергешов.Кітап жәрмеңкесіне астанадағы кітап баспалары өз өнімдерін қойған, олардың арасында әлем әдебиетінің жауһарларын, еліміздің ақын-жазушыларының туындыларын, балаларға арналған шығармаларды кездестіруге болады.
«Бүгінгі ұрпақтың смартфонға телміріп, кітап оқуды ұмыта бастағаны жасырын емес. Қолына телефон ұстап туатын жас буынды шығарма оқуға бейімдеу үшін ата-ана алдымен өзін тәрбиелеуі қажет. «Үш байлық», «Сеніммен болашаққа» қоғамдық бірлестіктері осы мақсатта бірқатар жұмыс атқарып, бүгінгі жәрмеңкеге ата-аналар мен балаларға арналған бірнеше кітап әкеліп отырмыз», – дейді қоғам қайраткері Оразкүл Асанғазы.Бұл жиынға зиялы қауым өкілдері, қаламгерлер, суретшілер, ұстаздар, студенттер мен оқушылар, БАҚ өкілдері қатысты.
«Кітапқа бет бұру – мәдениеттің төресі. Шекспир «Маған кітап тақтан да қымбат» десе, Асқар Сүлейменов «Жақсы кітап – ұяттың антологиясы» деген. Ал абыз атамыз Әбіш Кекілбай «Адамды адам қылған – кітап, адамзат қылған – кітапхана» дейді. Бүгінде кітапқа деген ықылас-ниет дұрысталды, кітап оқитындардың қатары көбейіп келеді. Республика көлемінде түрлі іс-шаралар, кітап жәрмеңкелері жиі өтетін болды. Бүгін де астананың төрінде сондай бір игі шара болып жатыр, кітапсүйер қауымды шын жүректен құттықтаймын», – деді ақын Маралтай Райымбекұлы.
Асыл ТҰМАР