Бишімбаевтың ісі бойынша сот тергеулері аяқталды

Судья Айжан Құлбаева Салтанат Нүкенованың өліміне қатысты сот тергеуінің аяқталғанын хабарлады. Тараптарға жарыссөзге дайындалуға уақыт берілді.Содан кейін сотталушылар – Қуандық Бишімбаев пен Бақытжан Байжановқа қатысты үкім жарияланады. Жарыссөз 29 сәуірде басталады, - деп хабарлайды Arbat.media.

Бүгінгі сот отырысы соңында судья айыпталушының позициясын нақтылау мақсатында сұрақ қойды, - деп жазады Kazinform агенттігі.

Бишімбаев әйеліне жасалған соққылар оның өліміне әкелгенін мойындап, алайда «аса қатігездікпен адам өлтіру» және «азаптау» баптары бойынша кінәсін мойындамайтынын айтты.

Еске салсақ, 2023 жылы 9 қарашада Астанадағы Bau мейрамханасында бұрынғы Ұлттық экономика министрі Қуандық Бишімбаев өзінің жұбайын соққыға жықты. Әйел жедел жәрдем жеткенше көз жұмды. Мұнан соң Ішкі істер министрлігі Қуандық Бишімбаевтың ұсталғанын растады.

Өткен жылы 15 қарашада өткен кеңесте Мемлекет басшысы Қасым-Жомарт Тоқаев Ішкі істер министріне Қ. Бишімбаевтің ісін ерекше бақылауға алуды тапсырды.

Биыл 11 қаңтарда елорда соты Қуандық Бишімбаевты күзетпен ұстау мерзімін 2 айға ұзартқан еді, 26 ақпанда Қуандық Бишімбаевтың ісі сотқа түсті.

1 наурызда Қуандық Бишімбаевтың ісі бойынша алдын ала тыңдау күні белгіленді. 11 наурыз күні Астананың Қылмыстық істер жөніндегі мамандандырылған ауданаралық сотында іс бойынша алдын ала тыңдау өтті. Алдын ала тыңдау 12 наурызда жалғасты.

27 наурызда елорданың қылмыстық істер жөніндегі мамандандырылған ауданаралық сотында Қ. Бишімбаевтың ісі бойынша алқабилерді іріктеу өтті.

29 наурыздағы сот отырысында марқұм Салтанат Нүкенованың ағасы Айтбек Амангелді куәгер ретінде жауап беріп, Қуандық Бишімбаев пен Салтанат Нүкенованың арасындағы алғашқы ұрыс-керістер қалай басталғаны туралы мәліметтер айтты және марқұмның бет-әлпеті көгерген сурет көрсетті.

Ал, 16 сәуірде Қуандық Бишімбаевтің ісі бойынша сот отырысы уақытша тоқтатылды.