Ақтау. 6 желтоқсан. ҚазТАГ – Ақтауда ыстық су беру уақытша тоқтатылды, деп хабарлады Маңғыстау облысы әкімдігінен.
«Аймақ басшысы облыс әкімінің бірінші орынбасары Бекбол Орынбасаровқа, қала әкімі Ербол Ізбергеновке, энергетика және тұрғын үй-коммуналдық шаруашылығы басқармасының басшысы Бердібек Қартбаевқа, «МАЭК» ЖШС бас директоры Талғат Есентүгеловке және оның орынбасары Мұрат Иғалиевке сөгіс жариялады», – деп хабарлады әкімдік.
Маңғыстау облысының әкімі Нұрлан Ноғаев қаланы жылу және ауыз сумен қамтамасыз ету мәселелеріне арналған кеңес өткізді және тұшыту қондырғысын жөндеуге байланысты ауыз судың қысымы төмендеген «МАЭК-Қазатомөнеркәсіп» кәсіпорнындағы жағдайды тұрақтандыру бойынша шұғыл шаралар қабылдауды тапсырды.
Әкімдік ақпарынша, қаланы жылумен үзіліссіз қамту үшін, ыстық су беруді уақытша шектеу туралы шешім қабылданған. Қазіргі уақытта мәселені шешу үшін барлық күш жұмылдырылған.
Бұған дейін ҚазТАГ Ақтауда апаттық жағдайдың алдын алу мақсатында су қысымын төмендетуге мәжбүр болғаны туралы хабарлаған еді.
Ақтауда ыстық су берудің тоқтатылуына байланысты мемқызметшілер сөгіс алды
