Ғұлама ақын Шәкәрім Құдайбердіұлының Алашорда үкіметіне қатысы туралы кейбір жайларды, ең алдымен оның Алаш көсемі Әлихан Бөкейхановпен арадағы үлкен туыстық, достық қарым-қатынасына байланыстыра отырып айтқан дұрыс. Өкінішке қарай, кешегі кеңес өкіметі кезінде бұл тақырыпта сөз қозғау мүмкін болмады. Алаш зиялылары артына қалдырған әдеби-рухани құндылықтарымыз туралы ауыз ашпақ тұрсын, олардың есімдерін атаудың өзі қорқынышты болды. Алайда, хакім Абайдың немере інісі, ақындық мектебінің ірі маңдайалды дарынды шәкірті Шәкәрім Құдайбердіұлын мүмкіндігінше әдеби шығармашылық тұрғыда ақтап алуға тырыстық. Оған кемеңгер жазушымыз Мұхтар Әуезовтің алғаш 1950 жылы Шәкәрім мұрасына араша түскен жанкешті әрекеті жеткілікті дәлел бола алады. Ал, Шәкәрім Құдайбердіұлының XIX ғ. соңы мен ХХ ғ. бірінші ширегіндегі қоғамдық-азаматтық қызметі туралы мүлде айтылмады. Бұл түсінікті де еді.