Зайсан жерінің елі Абай ауылымен аралас-құралас болған. Құнанбайдың анасы Зере найман қызы болғандықтан, Құрбан қажы (кезінде Қоңыз батыр атанған) нағашы-жиен болып, қатты қалжыңдасады екен. Зайсан өңірінің алғашқы қажылары Абай ауылына ат басын тіреп, құжаттарын Семейде реттестіріп, Құнанбаймен бірге Мекке-Мадинаға сапар шеккен. Осы сапарда Меккеде балаларға дәріс беріп жүрген зайсандық Әбдірахман Сыпырандыұлына жолығады. «Елге келіп, дін жолына түскен елге көмек бермейсің бе?» деген дерге ол «Әлі де екі жылдық оқуым бар» деген екен. Құнанбай бастаған қажылар оған қаржылай көмек беріп, ақ жол тілеген.