ХХ ғасырдың басындағы Қазақстанның қоғамдық-саяси ахуалы күрделі еді. Ел аумағы әкімшілік жағынан бытыраңқы, шаруашылық жүйесі әркелкі, демографиялық құрылымы ала-құла болды. 1924 жылы «Ақжол» газетінің №474 санында «Тоқпақ» бүркеншік атымен жарияланған сараптамалық мақалада сол кезеңдегі Қазақстанның шынайы көрінісі нақты статистикалық деректермен көрсетілді. Онда Орал мен Ақтөбе губернияларынан өзге аймақтардың бір-бірінен жер шалғайлығы, шаруашылық ерекшелігі, халқының ұлттық құрамы жағынан бір орталыққа ұйысуға дайын еместігі ашық жазылды.