ХХ ғасырдың басында патша үкіметінің боданына айналған тұтас бір ұлттың мүддесін ойлап, өз алдына дербес мемлекет болуы үшін Алаш арыстары қасық қаны қалғанша азаттық үшін арпалысты. Азаттық жолында күреске бел буған, Алаштың рухани көсемі Ахмет Байтұрсынұлы, Міржақып Дулатұлы туған Торғай өңірінде олардың идеясын қолдап, Ахметсапа Жүсіпұлы, Ахмет, Ғазымбек Бірімжандар, С.Қадырбай, Ғ.Нұрымұлы, Нұрғали, Нәзипа Құлжан сияқты жерлестері «Алаш» ісіне белсене араласты. Торғай өңірінен шыққан Алаш азаматтарының қатарында Файзолла Сатыбалдыұлының да болғаны ақиқат. Файзолла Сатыбалдыұлы – қазақ халқының бостандығы мен азаттығы жолында елеулі еңбек етіп, басын бәйгеге тіккен күрескер тұлға.