Биыл шешен-ингуш халқының депортацияланғанына 81 жыл толып отыр. Қазіргі Қазақстан аумағында тұрып жатқан шешендер мен ингуштар – тарихи оқиғалардың, әсіресе 1944 жылғы сталиндік депортацияның нәтижесінде осы елге қоныс аударған вайнах халқының өкілдері. Олар Солтүстік Кавказдан, негізінен Шешен-Ингуш Автономиялық Кеңестік Социалистік Республикасынан күштеп жер аударылып, Қазақстан мен Орта Азияға жіберілді. Бұл қанды операция «Жасымық операциясы» (Чечевица) деп аталды. Ал депортацияның өзі 1944 жылдың 23 ақпанында басталды. Осылайша шешен және ингуш халқының тарихында аса бір ауыр кезеңдер орнаған еді.