Жылқы жабдығы деп – жылқы түлігін басқару және пайдалану үшін қолданатын құралдарды айтады. Қазақ халқы жылқы жабдығын: тұрмыстық, сәндік, жауынгерлік мақсатқа орай әртүрлі жасайтын болған. Тұрмыстық мақсатқа: күнделікті шаруаға қажет жабдықтар жатады. Оны сәндемейді және қарапайым заттан жасайды. Ал сәндік мақсат үшін жасалған жабдықтар қатарына ұзатылатын қыздың ат жабдығы немесе ас-тойға, салтанатты жиынға баратын елағасы, ауыл ақсақалының ат-тұрман әбзелдері және отбасылық мұра үшін арнайы сәндеп жасатқан жабдықтар жатады. Жауынгерлік жабдықтың ерекшелігі – өте берік әрі сапалы жасалады. Оны сәндеп жатпайды, бірақ көшпенділер тәртібінде батырлар ер-тұрманы мен қару-жарағына ритуалдық таңба бәдіздейтін дәстүр болған.