Терминдерді ұлт тілінің өз лексикалық қорынан алып, мағынасына қарай терминдік жүк артып пайдалануға немесе өзге халықтардың тілдерінен дайын қалпында қабылдап қолдануға болады. Сонымен қатар əр тілдің сөз жасау жолдары, тəсілдері бар. Өзге тілдерден дайын атауларды алмай ұлт тілінде термин жасау кезінде осы тəсілдер пайдаланылады. Кезінде ұлт тілінде термин жасаған ұлт зиялыларының тілді жақсы білуімен қатар, тілдің заңдылықтары мен сөзжасам тəсілдерінен хабары мол болғанын байқауға болады. Оған Ахмет Байтұрсынұлының, Нəзір Төреқұлұлының, Елдес Омарұлының, Жұмахан Күдериннің, Мағжан Жұмабайұлының, Сұлтанбек Қожанұлының, Жүсіпбек Аймауытұлының, Телжан Шонанұлының, Халел Досмұхамедұлының, т.б. өткен ғасыр басындағы қазақтың ғылым тілінің қалыптасуына ат салысқан алаш азаматтарының жасаған терминдері мен жазған еңбектері дəлел бола алады.