Араб қарпімен (Ахмет Байтұрсынұлының төте жазу үлгісінде) басылып шығатын қырғыз тіліндегі «Эркін-Тоо» газетінің 1925 жылдың 27 тамызында жарық көрген №47 санында шағын ғана хабарлама жарық көрді. Онда Шымкент қаласында қазақ жеріндегі өзбек диқан қауымына арнап «Диқан табысы» деген жаңа газет шығарыла бастағаны айтылған еді. Бұл газет туралы дерек көпшілікке беймәлім болғанымен, сол замандағы баспасөз бен ұлт саясатынан хабар беретін қызықты тарихи мәлімет. «Диқан табысы» – кеңес өкіметінің алғашқы жылдарында Қазақстандағы өзбек қауымына арналып ашылған тұңғыш басылымдардың бірі болатын.