Ежелгі заманнан жеті саны көптеген халықтар үшін киелі, жұмбақ күшке ие деп есептелген. Ата-бабаларымыз да жетіні қасиетті сан санап, оны дүниетаным мен салт-дәстүрінің негізі еткен. Мысалы, көне түркі мифологиясында «жеті ғалам» түсінігі жеті басты бағыт – дүниенің төрт бұрышын (күншығыс, күнбатыс, түстік, терістік) және үш әлемді (аспан – жоғарғы ғалам, жер – орта ғалам, жер асты – төменгі ғалам) білдіреді. Ал ислам құндылықтарында да ғарыш жеті қабат көктен тұрады деп баян етіледі: Құранда Алла «Оларды жеті көк етіп, екі күнде жаратты» дейді. Осылайша, қазақ халқының «жеті» ұғымы түркілік көне дүниетанымымен қатар исламдық сенімнің көрінісіндей тоғысып жатады. Енді жеке-жеке тоқталайық.