Қазақстанның дәл орталық аумағында, Еуразия құрлығының жүрегінде орналасқан индустриалды қала Қарағанды қаласының құрылғанына келесі жылы тоқсан жыл толады. 1934 жылы 10 ақпанда Бүкілодақтық Орталық Атқару Комитеті Алқасының қаулысымен Қарағанды кенті қала мәртебесіне ие болған тарихы бар. Қарағанды – ежелден тоғыз жолдың торабындағы, Қазақстан мен төрт тараптағы елдердің өзара мәдени, экономикалық байланыстарын жүзеге асырушы орталық нүктесі ретінде сан түрлі тарихтың куәсі болған алқап. Осы қала орналасқан аумақтан Ұлы Жібек жолы мен кейінгі Абылайдың қара жолы өтетін. ХҮІІІ ғасырдағы қазақ пен жоңғар, шүршіт пен қазақ соғыстарының жорық жолдары да осы қаланың аумағымен өткен.