Ахмет Байтұрсынұлының төте жазу үлгісімен басылған қырғыз тіліндегі «Эркин-Тоо» газетінің 1925 жылы 8 маусымдағы №26 санында жарияланған Тойшыұлының мақаласы кеңестік дәуірдің алғашқы жылдарындағы қоғамдық-саяси ахуалды, жаңа биліктің ауыл ішіне қалай енгенін, көшпелі және жартылай көшпелі жұрттың санасына қандай ұғымдарды сіңіруге күш салғанын айқын көрсететін маңызды мәтіндердің бірі. Бұл мақала сырт қарағанда «Қосшы» ұйымының мән-мағынасын түсіндіретін үгіт-насихат материалы сияқты көрінгенімен, шын мәнінде ол сол кезеңдегі кеңестік биліктің Орта Азиядағы, соның ішінде қырғыз бен қазақ арасына жүргізген әлеуметтік жіктеу, саяси қайта құру, жаңа қоғамдық тәртіп орнату саясатының тікелей айғағы. Сондықтан бұл мәтінді тек ұйым жарғысын таныстыратын шағын мақала деп қарауға болмайды. Оның астарында дәстүрлі қоғамды бұзу, ел ішіндегі бедел иелерін әлсірету, кедейлерді биліктің жаңа тірегіне айналдыру, бұрынғы қоғамдық қатынастардың орнына таптық күреске негізделген жаңа жүйе орнықтыру мақсаты жатыр. Бұл мазмұн мақаланың әр жолынан сезіліп тұрады.