Париж олимпиадасының нағыз қызған шағы. Айтулы бәсекенің ортасынан аса бере кілемге грек-рим күресінің шеберлері шығып өнерлерін паш етті. 6 тамыз күні телеарналар эфирінен 77 келі салмақ дәрежесі бойынша қазақ палуаны Демеу Жадыраевтың күресі беріліп, барша қазақ халқы тамашалады десек артық айтқанымыз емес. Бұл жолы бабы да, бағы да келіскенін көрсеткен Демеу бауырымыз алғашқы қарсыласы колумбиялық Джейр Куеро Муньосты бұйым құрлы көрген жоқ. Есепті 9:0 етіп, белдесуді ерте аяқтады. Ол екінші рет Париж Олимпиадасының ширек финалында Токио Олимпиадасының күміс жүлдегері, әлем чемпионы, осы турнирдің басты фавориті саналған қырғыз палуаны Ақжол Махмұдовты жарыс жолынан ығыстырып жіберді. Есеп: 3-1. Ал жартылай финалда әзербайжандық палуан, ол да осал емес Санан Сулеймановты 6:1 есебімен жеңіп, финалға жолдама алды. Міне, қарсыласын партерден жұлып алып көтеріп тастайтын тегеурінді палуанның күресіне сүйсініп, ақтық сайыста алтын медаль алып, жеңіс тұғырынан көрінуіне шын тілектестік білдіріп отырмыз.