15 қараша – Ұлттық Валюта Күні. 1993 жылы Қазақстан Республикасының ұлттық ақшасы теңге айналымға енді. Бұл оқиға жас мемлекеттің экономикалық егемендігін нақты айқындап, дербес қаржы жүйесін қалыптастыру жолындағы шешуші қадам болды. Ол тек экономикалық тұрақтылықтың емес, ұлттық бірегейлік пен мәдени тұтастықтың көрінісіне айналды. Әлемнің жетекші елдерімен терезесі теңескен жас мемлекет өзінің төл валютасы арқылы саяси тәуелсіздігін экономикалық тұрғыдан бекемдей түсті. Ұлттық валютаның дүниеге келуі – ұзақ дайындық пен жауапкершілігі жоғары шығармашылық еңбектің жемісі. 1992 жылы Мемлекеттік банк тапсырмасымен арнайы дизайнерлер тобы құрылып, теңгенің көркемдік тұжырымдамасы мен визуалды бейнесін жасауға кірісті. Бұл істің басында өз ісінің хас шеберлері тұрды. Олар: Тимур Сүлейменов, Меңдібай Алин, Ағымсалы Дүзелханов, Досбол Қасымов және Хайролла Ғабжалилов. Бес бірдей суреткер мен дизайнердің бір мақсатқа ұмтылған еңбегі арқылы бүгінде барша қазақстандық үшін қадірлі әрі мақтаныш нышанына айналған ұлттық валюта дүниеге келді. Ендеше сол тұлғалармен толығырақ танысайық.