Түркі халқының әдебиетіндегі дамудың алғашқы сатылары X-XII ғасырлар деп айта аламыз. Осы ғасырларда жарық көрген діни, философиялық, дидактикалық шығармалар адамзат тарихының, түркі әдебиетінің асыл да құнды мұралары болып саналады. Түркі даласына ислам дінінің келуі елдің тұрмыс-тіршілігіне, тарихына, әдебиет әлеміне де жаңа дем алып келді. Бұл жайлы ғалымдардың да ойы да ондағы өзгерістердің құнды екенін еске салып өтеді. Ғалым А. Егеубаев «Сол X-XII ғасырдың өзінде-ақ Орта Азия, Қазақ елі аумағын мекендеген халықтардың мәдени даму биіктерінің бірі болған философиялық поэманың даналық ойлары күні бүгінге дейін аса құнды, өміршең» - деп өз пікірін айтады.