Өңірлік мерзімді басылымдар – өңірдің тыныс-тіршілігін айқындайтын бұқаралық ақпарат құралдарының алды. Олай дейтініміз, сағаттап яки минуттап жарық көретін ақпараттық сайттарға қарағанда мерзімді басылымдар танымға, жүйелі, дәйекті дерекке негізделген мақалаларды үнемі жазып отырады. Сондықтан да шығар, өңірлік мерзімді басылымдардың жай-күйі мемлекет пен қоғамның тарапынан ешқашан назардан тыс қалған емес. Күні кеше Ақпарат және қоғамдық даму министрлігінің ұйымдастыруымен Астанада екі күн бойы өңірлік мерзімді басылымдардың форумы өтті. Онда қазіргі медиаға, өңірдегі мерзімді басылымдарға қатысты күрделі мәселелер талқыланды. Аталған форум аясында «Қазақстан тарихы» порталы да ауқымды іс-шараға қатыса отырып, «Жалпы өңірдегі тарихи мәселелер қалай көтеріліп жүр? Мерзімді басылымдарда қазақ тарихына қатысты материалдар жарық көре ме?» деген сауалға жауап іздеп, жергілікті журналистермен тілдескен еді. Ендеше қадірлі оқырмандарымыздың назарына сол жергілікті мерзімді басылым тілшілерінің тарихи мәселелерге қатысты ой-пікірін ұсынып отырмыз!