Қаңтар оқиғасына қатысқандарға рақымшылық жасалады. Сенат депутаттары заң жобасын қабылдап, құжатты президенттің қол қоюына жіберді. Заңға сәйкес жазалаудан тек онша ауыр емес және ауырлығы орташа қылмыс жасағандар ғана босатылады. Ал, ауыр және аса ауыр қылмысқа барғандардың жазасы тек қысқартылады. Заң нормаларына сәйкес мемлекетке опасыздық жасағандар, террористер мен экстремистер түзеу мекемелерінен босатылмайды. Сондай-ақ Бас прокурордың орынбасары Әсет Шындалиевтің айтуынша, Дикий Арман мен Қайрат Құдайберген қаңтар оқиғасына байланысты рақымшылыққа ілінгендер қатарына кірмейді. Ал сенаторлардың сөзінше, рақымшылыққа шамамен 1 жарым мыңдай адам ілігеді және олар біртіндеп босатылады. Үкімет бұл азаматтарды жұмыспен қамтып, баспана мәселесін шешуге көмектеседі. МӘУЛЕН ӘШІМБАЕВ - ҚР ПАРЛАМЕНТІ СЕНАТЫНЫҢ ТӨРАҒАСЫ - Қабылданған заң Мемлекет Басшысының 2022 жылғы 1 қыркүйектегі Жолдауында берген тапсырмасын орындау мақсатымен әзірленді. Заң «Қасіретті қаңтар» оқиғасы кезінде тәртіпсіздіктермен байланысты қылмыстық құқық бұзушылықтарға барған азаматтарды қылмыстық жауаптылықтан босатуды және олардың жаза мерзімдерін қысқартуды көздейді. Сонымен қатар заңда рақымшылық жасауды қолдану шарттары, тәртібі және ол қаңдай адамдарға қолданылмайтыны туралы нақты нормалар белгіленген. Бұл заңды тәртіп бұзуға жол берген адамдарға қатысты қоғам мен мемлекет тарапынан жасалған гуманистік қадам деп қабылдаймыз. Бұдан былай осындай қайғылы оқиғалар елімізде ешқашан қайталанбайды деп сенеміз.