Еңбек және халықты әлеуметтік қорғау министрі Тамара Дүйсенова арнаулы әлеуметтік қызметтер көрсету және тариф белгілеу стандарттарын жетілдіру, сондай-ақ әлеуметтік қызмет көрсететін ірі интернат-үйлерді кезең-кезеңімен институционализациялау мәселелері бойынша кеңес өткізді. Іс-шараға өңірлер әкімдерінің орынбасарлары, жұмыспен қамтуды үйлестіру және әлеуметтік бағдарламалар басқармаларының басшылары, әлеуметтік қызмет көрсету жүйесін жаңғырту бойынша ұсыныстар әзірлеу үшін 2022 жылы ҚР ЕХӘҚМ Жобалық офисі жанынан құрылған 6 жұмыс тобының мүшелері, сондай-ақ үкіметтік емес ұйымдардың өкілдері қатысты. Кеңеске барлығы 46 ҮЕҰ өкілдері және мүгедектігі бар адамдардың 6 белсенді өкілі қатысты. Кеңес барысында Министрліктің жобалық офисі сыйымдылығы аз үйлерге тапсырыс беру жобасын таныстырды. Жұмыс топтарының мүшелері қатысушыларды қызметтердің неғұрлым сұранысқа ие түрлерін анықтау үшін әзірленген матрицалармен таныстырды, еліміздің барлық медициналық-әлеуметтік мекемелері қызметкерлерінің сапалық құрамын талдау және оларға жүктеме туралы айтып берді. Сондай-ақ сыйымдылығы аз үйлерде тапсырысты орналастыру үшін жан басына шаққандағы қаржыландыру тетігі қаралды, пилоттық жобаға қатысатын өңірлер анықталды. Талқылау қорытындысы бойынша кеңеске қатысушылар сыйымдылығы аз үйлерге тапсырыс беру жобасын мақұлдады. Кеңесті қорытындылай келе, министр Тамара Дүйсенова жұмыс топтарының мүшелеріне әлеуметтік қызмет көрсету стандарттарын жетілдіру және тариф белгілеуді енгізу бойынша көлемді және жемісті жұмысы үшін алғыс білдірді. Сондай-ақ, ол Парламент Сенаты қабылдаған ҚР Әлеуметтік кодексті ескере отырып, заңнаманы одан әрі жетілдіру қажеттігін атап өтті.