Бүгіннен бастап елімізде жанар-жағармай бағасы өсті. Энергетика министрлігі бензин мен дизель отынының шектік бағасы туралы бекіткен бұйрығы күшіне енді. Заңды құжатқа сәйкес шекті баға АИ-92 мен АИ-93 бензиндері үшін литріне 205 теңгеге, ал дизель отыны 295 теңгеге дейін. Дизель отынының бұрын белгіленген бағасы өзгеріссіз қалған. Яғни, көктемгі егіс жұмыстары аяқталғанша дизель отынының құны өзгермейді. Қазақстан азаматтары жүргізуші куәлігін көрсеткен кезде литрі 295 теңгеден тәулігіне 100 литр сатып ала алады. Ал, арнайы мамандандырылған көліктер үшін бекітілген лимит мөлшері 300 литр. Қалған санаттағы тұлғалар үшін дизель отының бағасы литріне 450 теңге. Айта кетсек, Қазақстанда жанар-жағармай бағасы 2021 жылдың күзінен бері өзгермеген еді. Бұл қолданылатын шара елден мұнай өнімдерінің кетуін азайтып, ішкі нарықтың өсіп келе жатқан қажеттілігін қамтамасыз етеді деп күтілуде.