Атырауда қасақана өртелген пәтерден 70 жастағы әйелдің мүрдесі табылды. Ал марқұмның ұлы күйікпен ауруханаға түскен. Атырау облыстық төтенше жағдайлар департаментінің мәліметінше, өрт бүгін түнде болған. Түнгі сағат 03-те қала ішіндегі тұрғын үйдің 1 қабатындағы пәтер өртенгені туралы шақырту түскен. Төтенше жағдайлар департаменті қызметкерлері автосатымен және баспалдақ арқылы 13 адамды, оның ішінде 6 баланы эвакуациялады. Ал, 54 адам, оның ішінде 30 бала өздері қауіпсіз аумаққа шыққан. Пәтердегі өрт сағат 40 минуттың ішінде толықтай сөндірілді. Ал қызыл жалынның алдын ала себебі – қасақана өртеу, дейді төтеншеліктер.