Мәжіліс депутаттары Түркістан қаласына ерекше мәртебе беру туралы заңды қарауға кірісті. Депутат Нұртай Сабильяновтың айтуынша, заң жобасы 2022 жылғы 27 қыркүйекте Мемлекет басшысының Түркістан облысына жұмыс сапары кезінде берілген тапсырмасын іске асыру үшін әзірленген. Дауыс беру нәтижесінде депутаттар құжатты қарауға кірісті. Заң жобасы мәдени мұраны сақтау және жаңғырту, дәстүрлі қолөнерді дамытуды, Түркістан қаласын рухани-мәдени, тарихи және туристік орталық ретінде дамытуды көздейді. Заңның қабылдануы қаланың тарихи-мәдени маңызы бар ескерткіштері мен объектілерін, оның ішінде Қожа Ахмет Ясауи кесенесін сақтаудың оңтайлы жүйесін құруға мүмкіндік береді.