Түркістанда жасыл алқап көлемін ұлғайту жұмыстары жүріп жатыр. Облыс әкімі Дархан Сатыбалды аталған саладағы жұмыстарды қадағалап, жауаптыларға тиісті тапсырмалар берді. Ең алдымен өңір басшысы көлемі 268 гектар Қарашық өзенінің жоғарғы жағындағы Бірлік ауылына барды. Мұнда 2019-2020 жылдары 350 мың данадан астам түрлі ағаш көшеттері егілген. Бүгінгі таңда олардың жерсінуі – 70-80 пайызды құрап отыр. Осыдан соң аймақ басшысы 120 гектар жерді алып жатқан орман тұқымбағында болды. Қазіргі таңда 33 гектар жерге ағаш-бұта тұқымдары себілсе, соның 4 гектарына тамшылатып суғару жүйесі орнатылған. Жер телімдерін аралау барысы Қарашық өзенінің төменгі жағында тұйықталады. 286 гектар аумақта 400 мыңнан астам түрлі ағаш көшеттері өсірілуде. Осы жерде жауапты басқарма басшысы облыс әкіміне жер телімін алу мәселесіндегі түйткілдерді айтып, көшеттердің жерсінуі ойдағыдай екенін мәлімдеді.
Жаңалықтар
