«Самұрық-Қазына» қоры Түркістан облысында екі ірі инвестициялық жобаны іске асыруды жоспарлауда. Оның бірі - Төлеби ауданындағы «Бу газ қондырғысы базасындағы қуаттылығы 926 МВт электр стансасы». Екіншісі - Созақ ауданында құрылысын жүріп жатқан «Күкірт қышқылы зауыты». Сондай-ақ облыстың туристік әлеуетін арттыру мақсатында Достық үйі мен ипподром әлеуметтік жобаларының құрылысы жоспарлануда. Бұл жайында облыс әкімі Дархан Сатыбалды «Самұрық-Қазына» АҚ Басқарма Төрағасы Нұрлан Жақыповпен кездесуінде баяндады. Онда «Әлеуметтік жобаларды дамыту қоры» арқылы қаржыландыруды қарастыру мәселесі талқыланды. Облыс басшысы елді мекендерді сапалы байланыспен, интернет пен табиғи газбен қамтамасыз ету секілді бірнеше өзекті мәселені ортаға салып, оларды шешу жолдары қарастырылды. Энергетика саласы бойынша да бірқатар ұсыныстар айтылды.