Елімізде “Дәрмек” республикалық жедел-профилактикалық іс-шарасы өткізілді. Онда қызмет барысында медициналық препараттарды пайдаланатын 831 кәсіпорын мен ұйым тексерілді. Нәтижесінде 11 қылмыс анықталып, әкімшілік жауапкершілікке 134 адам, оның ішінде 70 медицина қызметкері жауапқа тартылды. Сақтау шарттарын бұзғаны үшін 43 кг астам есірткі және психотроптық заттар, 5 мың дәрі және 20 мың ампула психобелсенді препараттар тәркіленген. Мәселен, тексеріс барысында Ақтөбе облысының өнеркәсіптік объектілерінің бірінің аумағында прекурсорлармен жұмыс істеу ережелері бұзылып, 20 тоннадан астам күкірт қышқылы тәркіленді. Ал Алматы қаласында медициналық ұйымды тексеру кезінде есірткі құралдарын сақтау және жою ережелерінің бұзылғандығы анықталып, онда 624 ампула промедол мен 825 ампула фентанил тәркіленді. Компания директорына қатысты қылмыстық іс қозғалды.