Таразда қылмыстық топ жетекшісі жастарды тәрбиелеу жөніндегі патриоттық белсенді атын жамылып қайырымдылық қоғамдық қорын ашқан. Ол өзінің қылмыстық беделін әділеттілікті жақтаушы – блогер имиджіне түбегейлі өзгертіп, әлеуметтік желілерде белсенді бола бастаған. Өз қорына демеуші ретінде қылмыстық қамқорлығы үшін кәсіпкерлерден ақша бопсалап, келіспегендерге күш қолданып келген. Полицияға топтың тоғыз мүшесі жеткізілді. Олардан қаңтар оқиғасы кезінде облыстық полиция департаментінен ұрланған Калашников автоматы, екі Макаров тапаншасы, мылтық, травматикалық тапанша мен басқа да суық қару тәркіленді. Сонымен қатар екі келіден астам есірткі табылған. Оларға қатысты 12 қылмыстық іс қозғалды. Күдіктілер уақытша ұстау изоляторына қамалды.