Түркістан облысында ауыл әкімдері мал саны бойынша бұрмаланған ақпарат беріп, жайылым жерге деген қажеттілікті артық көрсеткен. Заңбұзушылықтарды облыстық прокуратура қызметкерлері кезекті тексеру кезінде анықтапты. Қадағалаушы орган өкілдерінің айтуынша, мал басын жасанды түрде көбейту дерегі Арыстың бес ауылдық округінде тіркелген. Мәселен, Ақдала ауылдық округінде жекенің қолындағы 1382 мал жайылымға мұқтаж болса , әкім өз есебінде шалғайдағы шаруашылықтың да төрт түлігін қосып көрсеткен. Содан малдың санын 8817 деп беріпті. Осылайша тиісті нормативтен артық жайылым қажет деп жалған ақпарат берген. Сондай-ақ, ауыл әкімдері мен ветерениария қызметі берген мал саны екі түрлі екені анықталған. Жергілікті жерлерде жауаптылар жайылымдарды қайтару бойынша ақпараттық технологияларды қолданбайтын болып шықты. Сала мамандарының айтуынша мәжбүрлеп алып қою мен әкімшілік жауапқа тарту процедурасын да жүзеге асырмай келген. Бүгінгі күнге қайтарылған жайылым көрсеткіштері басым бөлігі тек өз еріктерімен қайтару және әкімдердің арнайы қордағы жерден ортақ жайылымға бекітіп беруі есебінен орындалып келген.