Түркістан облысында алғашқы бәйшешек бүр жарды. Бұл жаңалықты Ғани Назарбек есімді экобелсенді өз Facebook парақшасында жариялады. Оның айтуынша, бәйшешек Отырар ауданы мен Арыс қаласының шекарасы маңындағы Сырдария өзенінің жағасында өсіп шыққан. Дала гүлі сондай-ақ Сырдария-Түркістан мемлекеттік өңірлік табиғи саябағының аумағында да бүршік атты. Ал, әлеуметтік желіде жарияланған жазбаға оқырмандар тарапынан әртүрлі пікірлер жазылып жатыр. Мәселен, олардың арасында «Көктем жаңашылдық, бақыт, жақсылық әкелсін!», «Көктем келе жатыр. Соның белгісі», «Наурыздың нышаны» секілді пікірлер бар. Айта кетсем, Қызыл кітапқа енген өсімдік жұмсақ климатқа байланысты Қазақстанның оңтүстік аймақтарында бірінші болып гүлдейді. Мәселен, 2021 жылы жергілікті тұрғын 1 ақпанда бәйшешектің гүлдегенін фотоға түсіріп алған болатын. Ал өткен жылы алғашқы сурет 14 ақпанда жарияланыпты.