Түркістан орманшылары өңір тұрғындарына ескерту жасады. Шығыстағы жағдайдан кейін облыс көлеміндегі орманды дала алқаптарындағы қауіпсіздік, екі есеге күшейтілді дейді мамандар. Сондай-ақ, табиғат жанашырлары демалушы тұрғындарға от жағу кезінде аса абай болу керектігін айтуда. Ескерте кетейік, еліміздегі орманды аймақ қорының 11,4 пайызы Түркістан өңіріне тиесілі. Облыста 3,5 млн. гектарға жуық жасыл аймақ бар. Табиғатты қорғау мекемелерінде техникалар саны 2018 жылы 306 дана болса, қазіргі күнде 443 данаға жетіп, 44,8 пайызға өскен дейді жауаптылар. Соның өзінде 2022 жылы облыста 1 орман өрті тіркеліп, тілсіз жау 35,5 гектар жерді жалмаған.