Кәсібі дөңгелеген сайрамдық тұрғындар енді жылына 20 мың тонна өнім беретін құс фабрикасын салмақ. Бұл өз кезегінде инвесторлар көмегімен жүзеге асады. Әрі кәсіпкерлер тәжірбие жинап, зауыт, фабрикалар ісімен танысу үшін аспан асты еліне баруды көздеуде. Бұл туралы облыс әкімінің сайрамдық кәсіп иелерімен кездесуінде айтылды. Басқосуға ісін жаңа бастаған 50-ге тарта азамат қатысып, мәселелерін көтерді. Онда бизнесті қолдау бағытындағы мемлекеттік қолдау шаралары кеңінен талқыланды. Бұған дейін облыс әкімі кәсіпкерлік белсенділікті және инвестициялық тартымдылықты күшейту туралы тапсырма берген болатын. Нәтижесінде мал қалдықтарын ашық жерге төкпеу үшін, қалдықтарды қабылдайтын орын ашылды. Тіпті жергілікті кәсіпкерлер оны өңдейтін кәсіпорын салуды көздеп отыр.